Гьава-бакъ

Дагъистан бецIал рагъаз
Ругънал чIорто бакъвачIеб,
Цо чанго миллаталде
Бикьараб ватIан ккола …
Кьварараб тIабигIат ва гьава-бакъ бугеб Дагъистаналъе ЦIадаса ХIамзатицаялдаса мухIканаб хасият кьезе захIмалъила.

Жанисеб Дагъистаналъул северияб рахъалда буго Гумбет, лъарагI мацIалда гьеб рагIул магIна «бакълъул рахъ». Район буго ГIанди гIоралъул квегIаб рахъалда, Салатау мегIералъул югалъул лабаллъиялда.

ТIабигIат лъазабулез рикIкIуна гьаниб лъагIалида жаниб 229 къо гъветI-хер хIалтIизе гIураб хинлъи бугеблъун букIунилан. Гумбеталъул бакъбаккул рахъарлда ралъдал гьумералдаса 300 гIанасеб метралъул борхалъуда буго Дагъистаналъул тарихалда жаниб гIемерал лъалкIал тараб некIсияб ЧIиркъатIа росу.

Росу сверун ккун буго ралъдадаса 3000 метралдасаги рорхатал Салатау ва ГIарахъмегIералъ, гьел мугIруз гьаниб гьава-бакъалъеги асар гьабула. Риидал гьаниб 40 градусалъул багIари гIадатияб жо буго, хасало абуни ноль градусалдаса гIодобе ккани, гIурабго цIорой бугеблъун рикIкIуна.